Íþróttasálfræðingur kom Sterling aftur í gang

Ungstirni Liverpool, Raheem Sterling, átti erfitt uppdráttar á síðustu leiktíð hjá Liverpool en hefur heldur betur sprungið út í vetur.

Hinn 19 ára gamli Sterling ákvað að hitta íþróttasálfræðing eftir síðustu leiktíð og það skilaði sínu fyrir hann.

"Kannski heldur fólk að ég hafi alltaf verið fullur af sjálfstrausti. Eftir að hafa byrjað vel í fyrra þá fór ég að leita að auðveldu leiðinni í staðinn fyrir að láta vaða sjálfur," sagði Sterling.

"Fótboltinn hætti að koma náttúrulega hjá mér og ég var hættur að gera hlutina sem komu mér í liðið til að byrja með. Það hefur allt breyst. Skoðið markið gegn Man. City til að mynda. Fyrir þrem til fjórum mánuðum hefði ég gefið boltann í stað þess að taka ábyrgðina sjálfur."

Læknirinn sem Sterling hitti heitir Dr. Peters og hann fær hæstu einkunn hjá leikmanninum.

"Hann vinnur á frábæran hátt. Ég hélt í fyrstu að hann væri ekki rétti maðurinn fyrir mig en svo var ekki. Hann skilur leikmenn og tilfinningalegu hliðina á starfinu. Það sem hann segir hjálpar manni."