Tveir af hinum ákærðu sitja í stjórnum skráðra félaga

Staða stjórnarformanns N1 er óviss eftir að sérstakur saksóknari gaf út ákæru á hendur henni vegna starfa hennar í stjórn Sparisjóðs Reykjavíkur og nágrennis fyrir bankahrunið 2008.

Stjórnarformaðurinn, Margrét Guðmundsdóttir, er ásamt Guðmundi Erni Haukssyni, fyrrverandi sparisjóðsstjóra SPRON, og öðrum þáverandi stjórnarmönnum, ákærð fyrir lán sem SPRON veitti fjárfestingafélaginu Existu haustið 2008.

Auk tveggja fyrrnefndra eru Ari Bergmann Einarsson, Jóhann Ásgeir Baldurs og Rannveig Rist ákærð. Staða þeirra Margrétar og Rannveigar er frábrugðin stöðu hinna þriggja í ljósi þess að þær sitja núna báðar í stjórnum félaga sem skráð eru á aðallista Kauphallar Íslands.

Margrét situr í stjórn N1 en Rannveig í stjórn HB Granda. Margrét sagði sjálf í samtali við Fréttablaðið í gær að hún byggist ekki við því að ákæran hefði áhrif á stjórnarsetu sína. Síðar um daginn sendi N1 tilkynningu til Kauphallarinnar þar sem kemur fram að félagið muni afla sér upplýsinga og fara yfir málið á næstu dögum. Í tilkynningu frá HB Granda sagði einnig að farið yrði yfir málið.

Í reglum Kauphallar fyrir útgefendur fjármálagerninga er kveðið á um skilyrði til þess að einstaklingar með stjórnunarlega ábyrgð teljist hæfir til að gegna störfum sínum.

„Kauphöllin hefur lagt mikla áherslu á að einstaklingar sem bera stjórnunarlega ábyrgð í skráðum félögum, þar með taldir stjórnarmenn, eigi ekki feril að baki sem geti lagt orðspor viðkomandi félags í hættu eða dregið úr trausti á markaðnum,“ segir Baldur Thorlacius, forstöðumaður eftirlitssviðs Kauphallarinnar í svari við fyrirspurn Fréttablaðsins. Grunnkrafan sem gerð er til skráðra félaga sé að markaðurinn sé upplýstur með fullnægjandi hætti um feril stjórnenda, sér í lagi þegar kemur að atriðum sem geta varðað brot gegn lögum eða reglum.

„Í alvarlegustu tilvikunum, svo sem ef viðkomandi stjórnandi hefur verið sakfelldur fyrir efnahagsbrot eða borið stjórnunarlega ábyrgð í félagi sem hefur brotið alvarlega eða með ítrekuðum hætti gegn reglum Kauphallarinnar, getur þó komið til álita að athugunarmerkja hlutabréfin eða taka þau úr viðskiptum,“ segir Baldur.