Svíar kjósa þing á sunnudaginn

Þrátt fyrir töluverða velgengni í efnahagslífi Svíþjóðar þau átta ár sem Fredrik Reinfeldt hefur verið forsætisráðherra virðast Svíar ekki ætla að flykkjast að baki honum í þingkosningunum, sem haldnar verða á sunnudaginn.

Samkvæmt skoðanakönnunum hefur lengi stefnt í að hægri flokkarnir missi töluvert fylgi, en stjórnarandstöðuflokkarnir bæti við sig. Bilið hefur þó verið að minnka verulega nú á allra síðustu dögum.

Nokkur fylgisaukning myndi þó varla duga vinstri flokkunum til þess að ná meirihluta á þingi, og þar munar mest um Svíþjóðardemókratana sem hafa halað inn fylgi út á útlendingahræðslu sína og stefna nú í að fá tíu prósent atkvæða.

Enginn annar flokkur vill sjá Svíþjóðardemókratana með sér í stjórn, þannig að þessi tíu prósent yrðu fyrst og fremst til þess að torvelda meirihlutamyndun bæði til hægri eða vinstri.

„Við vöxum á því að fólk fái að koma inn í samfélagið okkar,“ sagði Reinfeldt forsætisráðherra í sjónvarpskappræðum í gær. Hann ítrekaði þá afstöðu sína að innflytjendur auðgi Svíþjóð og fjölmenning geri Svíþjóð að betra landi, en uppskar eins og vænta mátti hörð viðbrögð frá Jimmie Åkesson, leiðtoga Svíþjóðardemókratanna: „Þetta spennandi samfélag sem Fredrik Reinfeldt talar um einkennist af óeirðum og ýmsum öðrum grófum brotum.“

Åkesson er þar samt algerlega einn á báti meðal flokksleiðtoganna, þannig að vart verður mynduð hægri eða vinstri stjórn að loknum kosningum nema sem minnihlutastjórn með stuðningi eins eða fleiri flokka af hinum vængnum.

Stjórn Reinfeldts hefur reyndar verið minnihlutastjórn seinnihluta kjörtímabilsins, þar sem tvö þingsæti vantar upp á að hún hafi þingmeirihluta.

Fari svo, sem skoðanakannanir spá, yrði minnihluti hægri stjórnarinnar enn minni, en lítið myndi vanta upp á stjórnarmeirihluta vinstra megin.

Þar gæti hið nýja Femínistafrumkvæði komið til bjargar. Gudrun Schyman, sem var leiðtogi sænska Vinstriflokksins á árunum 1993 til 2003, stofnaði flokkinn árið 2005 og gæti nú í fyrsta sinn átt möguleika á því að ná manni á þing.