Börn eru höfð í einangrun á Litla-Hrauni

Fimmmenningarnir sem sakaðir eru um að hafa nauðgað sextán ára stúlku í samkvæmi aðfaranótt 4. maí síðastliðins eru allir vistaðir í einangrun á Litla-Hrauni.

Stefán Eiríksson, lögreglustjóri á höfuðborgarsvæðinu, segir að piltarnir séu í einangrun vegna rannsóknarhagsmuna.

„Það segir sig sjálft að við grípum ekki til íþyngjandi úrræða, og allra síst þegar börn eiga í hlut, nema ríkir rannsóknarhagsmunir séu til staðar.“

Bragi Guðbrandsson, forstjóri Barnaverndarstofu, segir einangrunina ekki brjóta gegn Barnasamningi Sameinuðu þjóðanna.

„Ákvæði samningsins kveða fyrst og fremst á um það að fangar á barnsaldri skuli ekki vera vistaðir ásamt fullorðnum föngum. Í þessu tilviki er um að ræða gæsluvarðhaldsúrskurð og vegna rannsóknarhagsmuna er þeim gert að vera í einangrun. Þá eiga ákvæði Barnasáttmálans ekki við. Út af fyrir sig er því ekki unnt að gera neina athugasemd við þetta.“

Þórarinn Viðar Hjaltason sálfræðingur, sem meðal annars hefur unnið á Litla-Hrauni, segir að einangrun geti tekið mjög á fólk en einstaklingar séu misviðkvæmir fyrir áhrifum einangrunarinnar.

„Í raun og veru er gæsluvarðhald streituvaldandi,“ segir Þórarinn. „Væntanlega hefur þetta meiri áhrif á þetta unga einstaklinga.“

Hæstiréttur hefur staðfest gæsluvarðhaldsúrskurð yfir mönnunum.