Farmur Akrafells losaður á morgun

Gert er ráð fyrir að farmur um borð í skipinu Akrafelli verði losaður á Reyðarfirði á morgun, laugardag. Áætlað er að draga skipið að Mjóeyri við Reyðarfjörð. Skipið hefur verið við bryggju á Eskifirði undanfarna daga þar sem unnið hefur verið við að þétta skipið og koma í veg fyrir frekara tjón og fyrirbyggja mengun.

„Undirbúningur og framkvæmd á flutningi skipsins er unnin í samráði við hlutaðeigandi aðila,“ segir í tilkynningu frá Samskipum.

Akrafell, flutningaskip Samskipa, strandaði við Vattarnes í liðinni viku. Að sögn hefur dæling úr skipinu gengið vel og tæknimenn vinna að því lágmarka tjón í vélarrúmi.

Í tilkynningunni segir að dráttarbátur frá Höfn í Hornafirði, Björn Lóðs og Björgunarskipið Vöttur muni aðstoða við flutning á Akrafellinu frá Eskifirði til Reyðarfjarðar.