Háflóð í nótt og hugsanlegt að skipið losni

„Það verður aftur háflóð um miðnætti og það er hugsanlegt að skipið losni þá,“ sagði Hrafnhildur Brynja Stefánsdóttir, upplýsingafulltrúi Landhelgisgæslunnar, eftir stöðufund um skipstrand Akrafells ásamt Umhverfisstofnun, Samgöngustofu, Hafrannsóknarstofnun og Samskipum.

Hrafnhildur segir stöðuna í raun óbreytta en á fimmta tímanum bárust fregnir þess efnis að köfurum hefði tekist að loka fyrir streymi inn í vélarrúm flutningaskipsins. „Dælurnar sem eru um borð hafa þá undan,“ útskýrir Hrafnhildur. Skipið er að léttast en ekki verður farið í að draga það upp fyrr en á morgun þegar Varðskipið Þór kemur um hádegi. „Kafarar hafa verið að skoða botninn utan frá og við fyrstu skoðun þá virðist allavega ekki vera nein stór rifa á skrokknum. En þetta verður allt skoðað betur á morgun í birtu.“ Hrafnhildur segir að nú hyggist Landhelgisgæslan hætta aðgerðum í bili en eftirlit verður með skipinu í nótt. „Varðskipið Ægir verður þarna í nótt og skipið sem er enn með dráttartaug fast í Akrafelli. Það verður mannskapur á staðnum að fylgjast með.“

Losni skipið í nótt í kjölfar háflóðs verður það annaðhvort dregið út á sjó eða inn í höfnina ef það virðist vera alveg stöðugt.

Hrafnhildur segir sex meðlimi áhafnarinnar hafa aðstoðað við björgunaraðgerðir í dag.