Moyes: Best að tala sem minnst um vítaspyrnudómana

Það var ekki hátt risið á David Moyes, stjóra Man. Utd, er hann gekk af velli eftir niðurlæginguna gegn Liverpool í dag. 0-3 tap gegn erkifjendunum særði alla sem að félaginu koma.

"Mér fannst ekki vera mikið að gerast í leiknum í hálfleik. Við vorum þó að komast í gang undir lok fyrri hálfleiksins. Við þurftum að mæta grimmir til seinni hálfleiksins en fengum því miður mark beint í andlitið á okkur," sagði Moyes.

"Ég held að ég hafi ekki einu sinni verið búinn að fá mér sæti á bekknum þegar þeir fengu vítið. Við reyndum að keyra en fyrir vikið vorum við alltaf að opna okkur."

Það er oft talað um að það sé ómögulegt að fá víti á Old Trafford en það átti ekki við í dag. Liverpool fékk þrjár vítaspyrnur en þetta er aðeins í þriðja sinn í sögu enska boltans sem lið fær dæmt á sig þrjú víti í sama leiknum.

"Ég held það sé best að tala sem minnst um þessa dóma. Sumt var víti og annað ekki. Eftir þennan leik erum við ansi fjarri fjórða sætinu. Við vitum það vel en munum halda áfram að berjast."