Viðbúnaðarstig í Noregi aftur í eðlilegt horf

Norska lögreglan hefur ákveðið að draga enn frekar úr viðbúnaðarástandi þar í landi vegna upplýsinga um yfirvofandi hryðjuverkaárásar sem tilkynnt var um í síðustu viku.

Þetta kom fram á blaðamannafundi norsku lögreglunnar síðdegis í dag. Viðbúnaðarstig er nú það sama og var áður tilkynnt var um hryðjuverkaógnina, að sögn NRK.

Sérstakri vopnaðri gæslu á helstu flugvöllum og lestarstöðvum verður hætt og landamæragæsla færð í eðlilegt horf.

Mikill viðbúnaður hefur ríkt í Noregi frá því í síðustu viku eftir að lögreglunni bárust upplýsingar um að Noregur væri hugsanlegt skotmark hryðjuverkamanna með tengsl við sýrlenska öfgahópa.