Gylfi: Getum vel náð í þrjú stig

Gylfi Þór Sigurðsson er þess fullviss að Tottenham geti komið í veg fyrir að Manchester City skelli sér á topp ensku úrvalsdeildarinnar í kvöld.

Liðin eigast við á White Hart Lane í Lundúnum í kvöld en með sigri kemst City upp fyrir Arsenal og á topp deildarinnar. Tottenham má þó helst ekki við tapi til að halda í við hin liðin í baráttunni um efstu fjögur sætin.

„Við sýndum þeim í fyrra þegar við unnum þá 3-1 á heimavelli að við erum vel færir um að ná í þrjú stig gegn þeim,“ sagði Gylfi í viðtali sem birtist á heimasíðu Tottenham.

„Við verðum að verjast vel því þeir eiga sérstaklega góða sóknarmenn í sínu liði. En við verðum líka að reyna að nýta okkur veikleika í þeirra varnarleik og skora nokkur mörk.“

Leikmenn Tottenham voru í fríi um síðustu helgi þar sem að liðið er úr leik í bikarnum en liðið vann síðast 3-1 sigur á Swansea fyrir tíu dögum síðan.

„Við höfum verið að æfa alla vikuna og erum klárir í slaginn,“ sagði Gylfi sem sem segir að það hafi verið erfið stund að upplifa 6-0 tapið gegn City á Etihad-leikvanginum í nóvember.

„Það var allra erfiðast að sitja á bekknum og fylgjast með,“ sagði Gylfi sem kom inn á sem varamaður í leiknum. „Tilfinningin inn í klefa eftir leik var ekki góð og strákarnir vilja sjálfsagt fá smá hefnd fyrir þetta tap.“