Rodgers með augastað á Úkraínumanni

Brendan Rodgers vill gjarnan styrkja leikmannahóp Liverpool áður en lokað verður fyrir félagaskipti um mánaðamótin og er sagður hafa áhuga á Yevhen Konoplyanka, leikmanni Dnipro í Úkraínu.

Liverpool var á höttunum eftir Mohamed Salah, leikmanni Basel í Sviss, sem var keyptur til Chelsea á dögunum. Rodgers hefur því snúið sér til Úkraínu og gæti fengið Konoplyanka fyrir sextán milljónir punda - um þrjá milljarða króna.

Konoplyanka er 24 ára gamall og getur spilað á báðum köntunum. Hann hefur reglulega verið orðaður við stórlið í ensku úrvalsdeildinni - allra helst Manchester United, Chelsea og Arsenal.

Rodgers sagði eftir 4-0 sigur Liverpool á Everton í gær að hann ætti von á því að Liverpool myndi ganga frá stórum leikmannakaupum fyrir mánaðamót.

„Vonandi klárum við ein stór kaup og þá verðum við í góðum málum fyrir seinni hluta tímabilsins,“ sagði Rodgers.