Suárez bestur að mati blaðamanna

Luis Suárez, framherji Liverpool, sem á dögunum var útnefndur besti leikmaður úrvalsdeildarinnar að mati leikmanna deildarinnar var í dag útnefndur besti leikmaður deildarinnar að mati blaðamanna.

Þessi magnaði framherji hefur farið á kostum í deildinni í vetur og skorað 30 mörk en hann er langmarkahæstur í deildinni. Næstur á eftir honum kemur Daniel Sturridge með 20 mörk.

Ekki nóg með að Suárez hafi skorað 30 mörk þá hefur hann einnig gefið tólf stoðsendingar og því komið að 42 mörkum Liverpool í úrvalsdeildinni eða tæpum helmingi marka liðsins.

Hann getur enn jafnað eða bætt met Alans Shearers og Cristiano Ronaldo yfir flest mörk skoruð á einu tímabili í ensku úrvalsdeildinni en það er 31 mark.