Tony Pulis er stjóri ársins - ekki Brendan Rodgers

Eðlilega hafa margir heillast af spilamennsku Liverpool í ensku úrvalsdeildinni í vetur og þá sérstaklega uppgangi Brendans Rodgers sem knattspyrnustjóra félagsins.

Fáir spáðu Liverpool Meistaradeildarsæti en Rodgers hefur búið til lið í kringum LuisSuárez sem getur enn orðið Englandsmeistari - eitthvað sem engum datt í hug fyrir tímabilið.

Því vilja margir sparkspekingar meina að hann sé knattspyrnustjóri ársins en erfitt er að mótmæla því miðað við árangur liðsins í úrvalsdeildinni á þessu tímabili.

Ewan Roberts, blaðamaður á knattspyrnuvefmiðlinum Goal.com, ritar ágæta grein í dag þar sem hann færir sín rök fyrir því að TonyPulis, knattspyrnustjóri Stoke, sé stjóri ársins en ekki Brendan Rodgers.

Tony Pulis tók við Crystal Palace eftir tíu umferðir en liðið var þá með þrjú stig í neðsta sæti deildarinnar. Það hafði unnið einn leik af tíu og var með 15 mörk í mínus.

Pulis hefur unnið lítið kraftaverk með Palace-liðið en það er fyrir löngu búið að bjarga sér frá falli og er nú í ellefta sæti deildarinnar með 43 stig eftir 36 umferðir.

Undir stjórn Pulis er sigurhlutfall Crystal Palace 46 prósent, liðið hefur fengið 1,5 stig í leik síðan hann tók við, er búið að skora 21 mark, fá á sig 22 og halda hreinu tíu sinnum.

Þegar Ian Holloway var með liðið í byrjun móts fékk það á sig 1,75 mörk í leik en með Pulis við stjórnvölinn fær það aðeins á sig 0,87 mörk í leik. Það er mun líklegra til árangurs.

Liðið hefur sem fyrr segir haldið hreinu tíu sinnum síðam Pulis tók við en aðeins Arsenal (12) og Chelsea (14) hafa haldið oftar hreinu á sama tíma.

Þegar Tony Pulis var knattspyrnustjóri Stoke var hann ekki vinsæll maður enda var leikstíll liðsins frekar leiðinlegur. Mjög varnarsinnaður og sóknirnar byggðust á löngum sendingum fram völlinn.

Pulis hefur endurnýjað sig í starfinu hjá Palace og nú eru aðeins fjögur lið í deildinni sem sparka boltanum sjaldnar langt fram völlinn en Palace-liðið og aðeins tvö lið reyna færri fyrirgjafir.

Frá stofnun úrvalsdeildarinnar hefur það lið sem byrjar desember á botni úrvalsdeildarinnar aldrei endað ofar en í 17. sæti og vanalega falla þau en Pulis getur enn endað með Crystal Palace í efri hluta deildarinnar.

Alla greinina á ensku með grafík frá Opta má lesa hér.