Mata yrði dýrasti leikmaður United frá upphafi

Juan Mata fer í læknisskoðun hjá Manchester United í dag. Standist hann hana verður hann dýrasti leikmaður Manchester United. Kaupverðið er talið vera um 37 milljónir punda.

Mata er 25 ára, fæddur í Burgos og hóf knattspyrnuferilinn hjá Real Oviedo. Hann gekk til liðs við Real Madríd árið 2003, lék ekki með a-liðinu en skoraði 10 mörk með b-liði Real í 39 leikjum.

Árið 2008 fór hann til Valencia og sló í gegn með liðinu, skoraði 46 mörk í 174 leikjum. Í ágúst 2011 borgaði Chelsea 26 milljónir punda fyrir hann og gerði við hann fimm ára samning. Mata var gríðarlega öflugur á síðustu leiktíð og kom við sögu í flestum leikjum Lundúnaliðsins á síðustu leiktíð ásamt Oscar og Fernando Torres.

Alls lék hann 64 leiki og var 55 sinnum í byrjunarliðinu. Mata skoraði 20 mörk fyrir Chelsea og varð næstmarkahæstur á eftir Fernando Torres sem skoraði tveimur mörkum meira. Leikmenn Chelsea völdu hann leikmann ársins á síðustu leiktíð en eftir að Jose Mourinho tók við liðinu var Spánverjinn settur út í kuldann.

Mata skoraði 11 mörk í 35 leikjum í úrvalsdeildinni á síðustu leiktíð en í vetur kom hann aðeins við sögu í 13 leikjum í deildinni og náði ekki að skora. Mata á að baki 32 leiki fyrir spænska landsliðið og er búinn að skora í þeim 9 mörk.

Í september 2008 borgaði United 30,75 milljónir punda fyrir Búlgarann, Dimitar Berbatov. Hann er dýrasti leikmaður United eins og sakir standa en það er líklegt til að breytast með komu Spánverjans á Old Trafford.