Gus Poyet: Núna fer ég að trúa á kraftaverk

Gus Poyet, knattspyrnustjóri Sunderland, var kátur í kvöld eftir að lið hans bjargaði sér endanlega frá falli úr ensku úrvalsdeildinni með 2-0 heimasigri á West Bromwich Albion. Sunderland sat lengstum í fallsæti á leiktíðinni en bjargaði sér með eftirminnilegum endaspretti.

„Ég veit ekki hvort að við sjáum svona einhvern tímann aftur. Við erum aðeins annað liðið í sögu ensku úrvalsdeildarinnar sem heldur sæti sínu eftir að hafa setið í botnsætinu um jólin," sagði Gus Poyet en lið hans vann sinn fjórða deildarleik í röð í kvöld.

„Við vorum sjö stigum frá öruggu sæti og áttum eftir útileiki á móti Manchester City, Chelsea og Manchester United en núna erum við öryggir þótt að það sé enn einn leikur eftir. Það er stórkostlegur árangur," sagði Poyet.

„Þetta er búið að vera ótrúlega erfitt tímabil og það leit út fyrir um tíma að við værum að fara niður. Ég fer á trúa á kraftaverk hér eftir og þetta er einn af bestu dögum lífs míns," sagði Poyet sigurreifur.