Suarez lagði upp bæði mörkin í bikarsigri

Victor Moses og Daniel Sturridge skoruðu mörk Liverpool sem vann góðan 2-0 sigur á Bournemouth í fjórðu umferð enska bikarsins í knattspyrnu í dag.

Heimamenn byrjuðu leikinn töluvert betur og sköpuðu sér nokkur hálffæri án þess að takast að láta reyna almennilega á Brad Jones í marki Liverpool. Það átti eftir að kosta þá um miðjan hálfleikinn þegar Liverpool komst yfir. Moses tók vel við sendingu Luis Suarez utan af kanti, lagði boltann fyrir sig rétt utan vítateigs og smellti honum neðst í markhornið.

Leikmenn Bournemouth gáfust ekki upp og héldu áfram að ógna marki Liverpool en eftir sem áður hafði Jones lítið að gera í markinu.

Liverpool leiddi 1-0 í hálfleik og eftir stundafjórðung í síðari hálfleik skoraði Sturridge. Englendingurinn fékk þá frábæra sendingu inn fyrir vörnina frá Luis Suarez og skoraði með hægri fæti. Sturridge og Suarez fengu báðir dauðafæri til að bæta við mörkum en niðurstaðan varð 2-0 sigur Liverpool.

Arsenal og Liverpool eru nú komin í pottinn fyrir dráttinn í 5. umferð keppninnar á morgun. Fjölmargir leikir eru framundan í dag og má fylgjast með gangi mála í þeim öllum í Miðstöð Boltavaktarinnar.