Aron Einar og félagar fóru áfram

Enska úrvalsdeildarfélagið Cardiff vann 1-0 baráttusigur á Bolton Wanderers í fjórðu umferð enska bikarsins í knattspyrnu í dag.

Aron Einar Gunnarsson var í byrjunarliði gestanna frá Wales og komst vel frá sínum leik. Hann fékk að finna fyrir því í síðari hálfleik þegar Jay Spearing, fyrrum leikmaður Liverpool, straujaði hann. Spearing fékk áminningu en norðlenski víkingurinn var fljótur að hrista flugferðina af sér.

Frazier Campbell skoraði eina mark leiksins á 50. mínútu eftir skelfileg mistök Andy Lonergan í marki Bolton. Liðsmenn Ole Gunnar Solskjær verða því í pottinum þegar dregið verður í fimmtu umferðina á morgun.