Lagerbäck er einmitt staddur í Cardiff í Wales þar sem Ísland mætir heimamönnum í vináttulandsleik á miðvikudaginn. Þetta er fyrsti landsleikur ársins þar sem þjálfararnir geta stillt upp sínu sterkasta liði.
John Toshack sagði af sér í september 2010 eftir sex ár sem landsliðsþjálfari Wales og stýrði aðstoðarmaður hans, Bryan Flynn, liðinu í síðustu tveimur leikjum liðsins í undankeppni EM 2012. Eftir það hófst leit Walsverja fyrir alvöru.
IanRush, LawrieSanchez, BrianFlynn, ChrisColeman og JohnHartson voru allir nefndir til sögunnar sem mögulegir eftirmenn Toshacks í breskum miðlum á þeim tíma en velska sambandið var spennt fyrir Lagerbäck og átti í viðræðum við Svíann.
„Það var í Madrid á ráðstefnu UEFA eftir HM sem ég hitti menn fyrst að máli. Ég talaði við yfirmann knattspyrnumála hjá velska sambandinu og Ian Rush. Við ræddum aðeins um velskan fótbolta. Stuttu eftir það ákvað herra Toshack að stíga til hliðar og þá sögðu þeir að augljóslega væri starfið opið til umsóknar. Ég ræddi þá fyrst við framkvæmdastjóra sambandsins,“ sagði Lagerbäck við BBC Wales í nóvember 2010.
Lars Lagerbäck var þá án starfs eftir að fara með Nígeríu á HM í Suður-Afríku 2010 en eins og allir vita stýrði hann sænska landsliðinu með mjög góðum árangri í tólf ár. Undir hans stjórn fór liðið fimm sinnum í röð á stórmót og því eðlilegt að lið eins og Wales vildu ræða við hann.
„Ég vil heyra aðeins meira í mönnum. Það má segja að á pappírunum lítur starfið vel út en maður vill vita meira um hvernig þeir líta á starfið og sjá hvernig sambandið vinnur,“ sagði Lars Lagerbäck þegar þjálfarastaðan hjá Wales losnaði.
Lagerbäck hefði orðið fyrsti þjálfari Wales sem ekki var frá Bretlandi hefði hann fengið starfið. Samlandi hans Sven-Göran Erikson, sem einmitt varð fyrsti útlendingurinn sem stýrði enska landsliðinu árið 2001, hvatti velska sambandið til að ráða Lagerbäck.
„Ég mæli með honum. Hann er góður maður. Allir sem þekkja til í alþjóðlegum fótbolta þekkja hann. Það er alveg klárt ... Hann stóð sig frábærlega með Svíþjóð og komst á nær öll stórmót sem í boði voru. Hann er metnaðarfullur og kann leikinn inn og út. Hann þekkir líka alþjóðlegan fótbolta mjög vel,“ sagði Erikson um Lagerbäck.
Svo fór þó að Lagerbäck fékk ekki starfið heldur var Gary Speed, þáverandi þjálfari Sheffield United, ráðinn frekar óvænt. Hann fékk leyfi frá Sheffield til að ræða við velska sambandið og skrifaði undir þriggja ára samning um miðjan desember 2010.
Það kom flestum í opna skjöldu því Chris Coleman, fyrrverandi þjálfari Fulham, og Lagerbäck voru á þeim tíma taldir líklegastir til að fá starfið. Vefútgáfa breska blaðsins Daily Mail gekk svo langt að fullyrða að Lagerbäck yrði boðinn fimm ára samningur.
Speed, sem spilaði 85 landsleiki fyrir Wales og var um tíma landsliðsfyrirliði, náði góðum árangri með liðið. Hann féll því miður frá langt fyrir aldur fram. Tæpu ári eftir að hann gerðist þjálfari Wales tók hann eigið líf í nóvember 2011.
Á þeim tíma gat Wales ekki leitað aftur til Lagerbäcks því rúmum mánuði áður hafði hann samið við íslenska knattspyrnusambandið um að gerast landsliðsþjálfari karla til tveggja ára. Flestir vita svo hvernig það fór. Hann, ásamt aðstoðarmanni sínum Heimi Hallgrímssyni, kom liðinu í umspil um sæti á HM í fyrsta skipti í sögunni.
Svíinn framlengdi svo samning sinn um tvö ár og verður aðalþjálfari ásamt Heimi út næstu undankeppni. Heimir Hallgrímsson tekur svo við liðinu fyrir undankeppni HM í Rússlandi 2018.
