Önnur lið sýna okkur meiri virðingu

Á miðvikudag mætir íslenska landsliðið því velska í öðrum æfingaleik sínum þetta árið. Strákarnir töpuðu fyrir Svíum, 2-0, í Abú Dabí í upphafi árs en aðeins leikmenn sem spila á Norðurlöndunum tóku þátt í leiknum.

Landsliðsþjálfararnir Lars Lagerbäck og Heimir Hallgrímsson gátu valið sitt sterkasta lið að þessu sinni en eini leikmaðurinn sem gat ekki gefið kost á sér vegna meiðsla að þessu sinni var Guðlaugur Victor Pálsson, leikmaður NEC Nijmegen í Hollandi.

Theodór Elmar Bjarnason og Björn Daníel Sverrisson fá tækifærið nú eftir góða frammistöðu gegn Svíum en Lagerbäck sagði leikinn bæði nýtast til að prófa unga leikmenn og slípa liðið til.

„Þetta er blanda af hvoru tveggja,“ sagði Lagerbäck á blaðamannafundi KSÍ í gær. „Maður vill alltaf nota sitt sterkasta lið en það er líka mikilvægt að prófa nokkra hluti og gefa óreyndari leikmönnum mínútur. Samkvæmt minni reynslu þurfa leikmenn minnst 10-12 landsleiki til að komast almennilega inn í hlutina,“ bætti hann við.

Ísland mætir einnig Austurríki ytra í lok maí og þá er unnið að því að finna liðinu fleiri æfingaleiki um það leyti. Fleiri tækifæri til að undirbúa liðið fyrir undankeppni EM 2016, sem hefst í haust, gefast ekki.

Dregið var í riðla á dögunum og lenti Ísland í næststerkasta riðlinum að mati Lagerbäcks. Engu að síður er markmiðið að lenda í einu af tveimur efstu sætunum og öðlast þar með þátttökurétt í lokakeppninni í Frakklandi.

„Ég heyrði mikið frá öðrum þjálfurum að enginn þeirra vildi fá Ísland úr fimmta styrkleikaflokknum. Kannski var það að einhverju leyti kurteisi en svo virðist sem önnur lið sýni okkur aðeins meiri virðingu nú.“

Lagerbäck segir það slæmt að hafa fengið Kasakstan úr sjötta og neðsta styrkleikaflokkinum. „Með fullri virðingu fyrir hinum liðunum í þeim flokki ættum við að geta fengið sex stig gegn þeim liðum. Það er alls ekki sjálfgefið gegn Kasakstan, auk þess sem að ferðalagið þangað er langt og leiðinlegt.“

Önnur lið í riðli Íslands eru Holland, Tyrkland, Tékkland og Lettland.