Lítið miðar í kjaradeilu kennara

Framhaldsskólakennarar funda nú í húsi ríkissáttasemjara og hófst fundur þeirra í dag klukkan níu í morgun.

Í dag hefur verið unnið að kjarasamningsákvæðum sem tengjast vinnutíma og innleiðingu á nýjum framhaldsskólalögum. Þau fela meðal annars í sér lengingu á skólaárinu og upptöku á nýrri framhaldsskólaeiningu og hugsanlegum möguleika á styttingu framhaldsskólanna.  

„Kjarasamningurinn verður að taka mið af þessu. Þetta er tæknilega flókin vinna og sjáum við fram á að halda áfram að vinna í þessu næstu daga,“ segir Ólafur H. Sigurjónsson, formaður Félags stjórnenda í framhaldsskólum. Þá segir hann þeim lítið miða áfram og gerir ráð fyrir að fundað verði um málið alla helgina.