Naismith gefur atvinnulausum miða á völlinn

Skoski landsliðsmaðurinn Steven Naismith hjá enska úrvalsdeildarliðinu Everton hefur keypt miða á heimaleiki Everton í vetur til að gefa atvinnulausum víðsvegar um Liverpool.

„Ég kem frá Ayrshire í Vestur-Skotlandi og hef búið drjúgan hluta ævi minnar í Glasgow, borg sem hefur þurft að þola mikið atvinnuleysi á ýmsum tímum,“ sagði Naismith sem kom frá Rangers árið 2012.

„Sömu sögu er að segja frá Liverpool og ég er meðvitaður um það. Það eru margir atvinnulausir í Liverpool sem eiga erfitt með að fá vinnu og hafa ekki efni á miðum á völlinn. Þetta er það minnsta sem ég get gert til að hjálpa fólki í þessari stöðu til að eiga góða stund á einum af leikjunum okkar. Vonandi get ég glatt marga með þessu,“ sagði sóknarmaðurinn.

Naismith hefur fengið atvinnuleysisskrifstofur í Liverpool-borg til að aðstoða sig við að gefa miðana.

Naismith hefur látið mikið að sér kveða og unnið sjálfboðavinnu í skýlum heimilislausra í Liverpool og Glasgow. Hann setti einnig á laggirnar verkefni í Glasgow sem vinnur að því að hjálpa slösuðu þjónustufólki að finna vinnu og er sendiherra fyrir lesblindu í Skotlandi.

„Ég er mjög þakklátur fyrir þau tækifæri og þann lífsstíl sem starf mitt sem fótboltamaður hefur veitt mér og fjölskyldu minni. Fótboltinn hefur komið mér í stöðu þar sem ég get látið gott af mér leiða í samfélaginu á lítinn hátt,“ sagði Skotinn með stóra hjartað.