Vandamál ef ég verð á bekknum í næsta leik

Svíinn John Guidetti er óánægður með hversu lítið hann hefur fengið að spila hjá Stoke en hann er þar sem lánsmaður frá Manchester City.

Guidetti er 21 árs gamall og talinn stórefnilegur. Hann glímdi hins vegar við erfið veikindi í næstum tvö ár og ætlaði sér að komast aftur af stað hjá Stoke.

„Við höfum nú ekki skorað í tveimur leikjum í röð,“ var haft eftir Guidetti í viðtali við sænska blaðið Expressen eftir að hann var ónotaður varamaður í leik Stoke gegn Chelsea á sunnudag. Þar áður kom hann inn á sem varamaður gegn Crystal Palace og spilaði í tæpan stundarfjórðung.

„Hvað er það verst sem getur gerst ef ég fæ að spila - að við skorum ekki? Við verðum að sjá hvernig þetta verður í næsta leik því annars verður vandamál,“ sagði Guidetti.

Hann missti af síðustu æfingum liðsins fyrir leikinn gegn Chelsea vegna magaveikinda. Engu að síður hefur hann lítinn skilning á ákvörðun Mark Hughes, knattspyrnustjóra Stoke.

„Mér gekk vel gegn Crystal Palace og fékk góð viðbrögð við frammistöðu minni. Þannig að ég átti von á því að fá aftur tækifæri. Ef við hefðum verið að raða inn mörkunum hefði ég haft betri skilning á þessu. En þetta var bikarleikur og hefðu engu skipt ef við hefðum fengið annað mark á okkur.“

„Ég skil þetta ekki og því verður maður reiður. En annars líður mér mjög vel og æfingar hafa gengið vel. En það er erfitt að gera nokkuð þegar maður fær ekkert að spila.“