Langþráður sigur hjá lærisveinum Laudrup - úrslit kvöldsins í enska

Lærisveinar Danans Michael Laudrup unnu langþráðan sigur í ensku úrvalsdeildinni í kvöld, Liverpool fór illa með nágranna sína, Juan Mata byrjaði vel með Manchester United og Arsenal tapaði stigum á útivelli á móti Southampton.

Manchester United vann 2-0 sigur á Cardiff City í fyrsta leik Spánverjans Juan Mata með United-liðinu. Ole Gunnar Solskjær þurfti því að sætta sig við tap í endurkomu sinni á Old Trafford. United-liðið eyddi metupphæð í Mata í vikunni og hann átti fína innkomu í liðið eins og Robin Van Persie sem skoraði sínum fyrsta leik síðan í byrjun desember.

Manchester City getur náð toppsætinu á morgun eftir að Arsenal náði aðeins einu stigi í heimsókn sinni á St. Mary's leikvanginn í Southampton. Bæði liðin komust yfir í leiknum en leikurinn endaði með 2-2 janftefli.

Liverpool skoraði þrjú mörk í fyrri hálfleik og vann öruggan 4-0 sigur á Everton á Anfield í Merseyside-slagnum. Daniel Sturridge skoraði tvö mörk á tveimur mínútum í fyrri hálfleiknum en hin mörkin skoruðu fyrirliðinn Steven Gerrard og hinn sjóðheiti Luis Suárez.

Swansea vann langþráðan sigur þegar Fulham kom í heimsókn. Swansea-liðið hafði ekki unnið í deildinni í átta leikjum eða síðan í byrjun desember. Jonjo Shelvey og Chico Flores skoruðu mörkin í seinni hálfleiknum.

Crystal Palace heldur áfram að snúa við blaðinu undir stjórn Tony Pulis og liðið vann enn einn 1-0 sigurinn í kvöld. Jason Puncheon skoraði eina markið í gríðarlega mikilvægum sigri á Hull en sigurinn skilaði Palace-liðinu upp í 14. sæti deildarinnar.



Úrslit og markaskorarar í ensku úrvalsdeildinni í kvöld:

Manchester United - Cardiff 2-0

1-0 Robin van Persie (6.), 2-0 Ashley Young (59.)

Norwich - Newcastle 0-0

Southampton - Arsenal 2-2

1-0 Jose Fonte (21.), 1-1 Olivier Giroud (48.), 1-2 Santi Cazorla (52.), 2-2 Adam Lallana (54.).

Swansea - Fulham 2-0

1-0 Jonjo Shelvey (61.), 2-0 Chico Flores (75.)

Crystal Palace - Hull 1-0

1-0 Jason Puncheon (16.)

Liverpool - Everton 4-0

1-0 Steven Gerrard (21.), 2-0 Daniel Sturridge (33.), 3-0 Daniel Sturridge (35.), 4-0 Luis Suárez (50.).