Sony mun sýna The Interview

Kvikmyndaframleiðslufyrirtækið Sony hefur tilkynnt að kvikmyndinni The Interview verður komið í takmarkaða dreifingu í Bandaríkjunum á jóladag. Sony hætti við að sýna myndina í síðustu viku eftir að fyrirtækið varð fyrir umfangsmikilli tölvuárás, sem ríkisstjórn Norður-Kóreu hefur verið bendluð við.

BBC hefur eftir Michael Lynton, forstjóra Sony, að hann sé „spenntur“ fyrir því að áhorfendur fái nú að sjá gamanmyndina, sem fjallar um tilraun Bandaríkjamanna til að koma Kim Jong-Un, leiðtoga Norður-Kóreu, fyrir kattarnef.

Þegar hafa tvö kvikmyndahús í Bandaríkjunum lýst því yfir að þau muni sýna myndina. Ríkisstjórn Norður-Kóreu hefur fordæmt gerð myndarinnar en jafnframt neitað því að standa að baki árásinni á Sony.