Jackett vill að Björn Bergmann sanni sig hjá Wolves

Björn Bergmann Sigurðarson er enn samningsbundinn enska B-deildarliðinu Wolves og Kenny Jackett, stjóri liðsins, er enn vongóður um að kappinn hafi áhuga á að spila hjá liðinu.

Björn gekk í raðir Wolves árið 2012 en fékk lítið að spila fyrsta tímabilið. Liðið féll svo í C-deildina um vorið og Björn Bergmann var lánaður til Molde í Noregi, þar sem hann varð meistari í haust.

„Að öllu óbreyttu er hann væntanlegur aftur en það hafa engar viðræður átt sér stað á milli félaganna um að félagaskiptin verði varanleg,“ sagði Jackett við enska fjölmiðla.

„Ég vil gjarnan halda opnum huga því hann býr yfir þeim líkamlegu eiginleikum sem maður leitar að í fari leikmanna. En það mun mikið velta á viðhorfi Björns og hversu ákveðinn hann er. Vill hann sanna sig í enskum fótbolta?“

„Hann er enn ungur og getur enn látið reyna á þetta. Þetta snýst um hvort að hann vilji nýta þetta tækifæri og við munum því sjá til.“