Meðaltal leiðréttingarinnar um 1.350 þúsund

Meðaltal leiðréttingarinnar svokölluðu eru 1.350 þúsund krónur. Einstaklingar munu að meðaltali fá 1.090 þúsund og hjón um 1.510 þúsund. Því gætu skuldir heimilanna lækkað um tuttugu prósent að meðaltali, séu úrræðin nýtt til fulls, þ.e skattaafslátt af séreignarsparnaði ásamt niðurfærslu af verðtryggðum húsnæðislánum. Þetta kom fram í máli Halldórs Benjamíns Þorbergssonar hagfræðings sem kynnti skuldaleiðréttingu ríkisstjórnar Íslands í Hörpu í dag. Þeir sem um niðurfærsluna sóttu geta séð niðurstöður hennar á morgun og svo samþykkt hana í desember. Þess á milli getur fólk gert athugasemdir og/eða kært niðurstöðuna.

Um 70 prósent samþykktra umsókna um leiðréttingu renna til einstaklinga sem skulda minna en 15 milljónir króna og heimila sem skulda minna en 30 milljónir króna. Stærstur hluti fer til einstaklinga sem skulda 10-20 milljónir króna og hjóna sem skulda 20-30 milljónir króna. Þá mun ríflega helmingur eða 55 prósent renna til einstaklinga sem eiga 4 milljónir króna í eigin fé í húsnæði sínu og hjóna sem eiga minna en 13 milljónir króna.  Þá fær fólk sem var yngra en 50 ára við forsendubrestinn árið 2009 stærsta hluta leiðréttingarinnar, eða um 68 prósent. Það er fólk sem er með lágar tekjur og skulda á bilinu 15-30 milljónir króna. Hæsta fjárhæðin fer til hjóna þar sem eldri aðilinn var orðinn 35 ára við forsendubrestinn.

Um 91 þúsund sóttu um niðurfærsluna og býr meginþorri þeirra á höfuðborgarsvæðinu. Þó er ekki búið að skipta umsóknunum niður eftir búsetu, að sögn Bjarna Benediktssonar fjármála- og efnahagsráðherra. Greint var frá því í Fréttablaðinu í dag að um 15 þúsund umsóknum hafi verið hafnað en Bjarni segir þær tölur ekki liggja fyrir. „Það er ekki endanlega komið í ljós. Við erum með um 90 þúsund lán sem búið er að reikna. Síðan er um 10 prósent af heildarumsóknum sem enn eru til frekari úrvinnslu út af einhverju viðbótarflækjustigi,“ sagði Bjarni í samtali við Vísi.