Erlent

Auka á fjölbreytni í húðlit emoji fígúra

Kjartan Atli Kjartansson skrifar
Til stendur að auka fjölbreytileikann í emoji táknum.
Til stendur að auka fjölbreytileikann í emoji táknum.
Samtökin sem hafa yfirumsjón með hönnun hinna svokölluðu emoji tákna, The Unicode Consortium, hafa í hyggju að ná til fleiri manns. Til stendur að auka fjölbreytileikann í húðlit táknanna sem eru mikið notuð í samskiptum með snjallsímum.

„Fólk um allan heim vill eiga emoji sem endurspegla betur fjölbreytileika mannkynsins. Þetta á sérstaklega við um húðlit,“ segir í skýrslu samtakanna. Hingað til hafa andlit flestra emoji táknanna verið gul. En nú stendur til að gefa fólki val um hvernig táknið á að vera á litinn.

Fyrr á árinu var greint frá því að Apple og Unicode Consortium ætluðu í sameiningu að auka úrvalið á táknunum. Notkun emoji táknanna jókst mikið með iOS 6 uppfærslunni, þegar táknum var fjölgað og gerð aðgengileg öllum notendum og var hægt að nota í fleiri forritum.

Baráttan fyrir auknum fjölbreytileika í húðlit emoji tákna hefur staðið yfir í þónokkurn tíma. Vefurinn Jezebel rekur upphafið fyrir baráttunni á opinberum vettvangi til engrar annarar en söngkonunnar Miley Cyrus, eins og sjá má hér að ofan. Tístið fékk sterk viðbörgð, á sjöunda þúsund manns endurbirtu það (e. Retweet).

Í ágúst í fyrra gekk undirskriftalisti á netinu þar sem skorað var á þau samtök og fyrirtæki sem hafa áhrif á hvaða emoji tákn eru hönnuð að fjölga emoji táknum sem endurspegluðu aðra kynþætt en þann hvíta. Í áskoruninni, sem skrifað var undir, stóð að hægt væri að velja tákn sem sýndu allar hliðar tunglsins, brosandi kúk og tvö kameldýr. En þau tákn sem væru með annan húðlit en hvítan væru einungis tvö, af áttahundruð. Það væri asískur maður og maður með túrban.

Á vefnum The Atlantic birtist gagnrýni á Unicode Consortium fyrir að hafa fjölgað táknum um 250 en ekkert þeirra endurspeglaði aðra kynþætti. Fjölgunin kom eftir að samtökin ætluðu í samstarf með Apple að auka fjölbreytnina í húðlit tákna.

Fleiri tónlistarmenn en Miley Cyrus hafa tjáð sig um málið. Söngvarinn, leikarinn og dansarinn Tahj Mowry tísti um þetta, eins og  sjá má hér að ofan. Hinn póst-móderníski rappari Lil‘ B lét hanna sín eigin tákn og lagði þannig sín lóð á vogaskálarnar. Fyrirtækið Oju Africa gerði slíkt hið sama og vakti það athygli. 



Málið hefur verið til umfjöllunar hjá Time, Al Jazeera, LA Times og fleiri stórra fjölmiðla. Málið skiptir marga máli. Á vef Jezebel kemur fram að haldið verði áfram að berjast fyrir auknum fjölbreytileika þó svo að breytingar hafi verið boðaðar. Uppfærslan á að líta dagsins ljós á næsta ári. „En við berjumst samt áfram,“ segir í samantekt Jezebel.

Mest lesið


Fleiri fréttir

Sjá meira


×

Mest lesið