Ekkert stig og ekkert mark síðan að stjórinn fékk nýjan samning

Aston Villa tapaði fimmta leiknum í röð í ensku úrvalsdeildinni í gær þegar liðið lá í fallbaráttuslag á móti Queens Park Rangers.

Það er ekki langt síðan að Aston Villa var með 10 stig eftir fjóra leiki og sat í öðru sæti ensku úrvalsdeildarinnar eftir 1-0 sigur á Liverpool.

Paul Lambert, knattspyrnustjóri Aston Villa, fékk nýjan samning 17. september þremur dögum fyrir leik á móti Arsenal í fimmtu umferð.

Villa-liðið var þá aðeins búið að fá á sig eitt mark í fyrstu fjórum leikjunum og það stefni loksins í skemmtilegt tímabil fyrir stuðningsmenn Villa eftir öll fallbaráttu tímabilin á síðustu árum.

Síðan að Paul Lambert fékk nýja samninginn (gildir til 2018) þá hefur Aston Villa liðið hvorki fengið stig né skorað mark í heilum fimm leikjum. Liðið hefur síðan þá tapað fyrir Arsenal (0-3), Chelsea (0-3), Manchester City (0-2), Everton (0-3) og QPR (0-2). Mörkin eru 0, stigin eru 0 og markatalan er -13 (0-13).

Aston Villa hefur fallið niður um þrettán sæti í þessum fimm umferðum og er nú aðeins tveimur stigum frá fallsæti.