Býður kynlíf í skiptum fyrir ferðalag

Nítján ára kínversk kona hefur vakið athygli á netinu með því að bjóða kynlíf í skiptum fyrir ferðalag. Hún vonast til þess að ferðast um Kína og eyða nóttu með einum manni í hverri borg sem hún ferðast til.

Konan sem heitir Ju Peng birti auglýsingu á kínverska vefnum Weibo  þar sem hún óskaði eftir „tímabundnum kærustum“. Hún vildi kynnast mönnum sem væru myndarlegir, yngri en þrjátíu ára, hærri en 175 sentímetrar og vel stæðir.

Ju er frá Sjanghæ. Hún býðst til að eyða nóttinni með mönnum ef þeir borga ferðakostnað og útgjöld fyrir hana. „Þeir þurfa að fjármagna ferðalagið mitt til borgarinnar sem þeir búa í og greiða fyrir öll mín útgjöld á meðan ég dvel í borginni. Þeir þurfa einnig að vera gjafmildir,“ segir í auglýsingu hennar.

Þar segir einnig: „Í staðinn fá þeir heila nótt með mér. Þeir fá alla athygli mína og þeir fá tækifæri til að láta sjá sig með virkilega fallegri stúlku.“

Auglýsingin hefur vakið hörð viðbrögð í Kína og hafa margir beðið um að auglýsingin verði fjarlægð. Þeir sem um það biðja segja að þetta sé ekkert annað en vændi. Ju hefur svarað þessum gagnrýnisröddum og segir að þetta sé frekar líkara því „húkka far“. Hún segist ekkert skammast sín fyrir þetta.

Hún hefur þegar ferðast um austurhluta Kína og vill nú sjá aðra hluta landsins.