Varamaðurinn tryggði Kára og félögum sigurinn gegn Leeds

Kári Árnason var í sigurliði Rotherham í kvöld sem lagði Leeds, 2-1, í fyrsta leik tólftu umferðar ensku B-deildarinnar í fótbolta.

Mirco Antenucci kom gestunum frá Leeds yfir, 1-0, með marki á 30. mínútu og þannig stóðu leikar í hálfleik.

Heimamenn komu aftur á móti sterkir til leiks í síðari hálfleik og jafnaði Alex Revell metin, 1-1, á 58. mínútu.

Fimm mínútum síðar gerði Steve Evans, stjóri Rotherham, skiptingu sem átti eftir að breyta gangi leiksins.

Hann setti inn á Jonson Clarke-Harris sem kom Rotherham yfir eftir að vera inn á vellinum í tvær mínútur, 2-1.

Leeds-liðið sótti nokkuð stíft undir lokin en Kári Árnason og félagar stóðu vaktina með sóma í vörninni og þá varði Adam Collin tvívegis stórkostlega í markinu.

Rotherham lyfti sér upp um tvö sæti með sigrinum, upp í það fimmtánda, en liðið er með fimmtán stig eftir tólf leik. Leeds er einnig með fimmtán stig, sæti ofar en Rotherham.