Sakar forstjóra MS um rógburð

Ólafur M. Magnússon hjá Kú hefur ritað Einari Sigurðssyni forstjóra hjá Mjólkursamsölunni skeyti þar sem hann kvartar undan rógburði.

Skeytið er einnig stílað á Guðna Ágústsson, framkvæmdastjóra Samtaka afurðarstöðva í mjólkuriðnaði, en þar segist Ólafur fengið símtöl þar sem fólk er yfir sig hneykslað á orðræðu sem almennir starfsmenn hafa haft um sig persónulega, fyrirtæki sitt, fjölskyldu og starfsfólk. Að auki segist Ólafur hafa undir höndum gögn frá Einari og Guðna sem eru af sama meiði.

Ljóst má vera á á efni bréfs Ólafs að hann ætlar að rógsherferð sé undan rifjum Einars og Guðna runnin. „Ég ætla ekki að fara á sama ról og þið í þessum málum, ég veit að MS er gott fyrirtæki með mörgu góðu og hæfu starfsfólki sem nú líður fyrir misgjörðir misviturra manna. En mest líða þó neytendur og bændur í þessu máli sem munu á endanum bera skarðan af ykkar framgöngu allri.“

Hér má sjá bréf Ólafs í heild sinni:

Sæll Einar/Guðni.

Ekki siglir það háreistu hjá ykkur frekar en fyrri daginn.  Hef fengið hingað til mín símtöl þar sem fólk hefur verið yfir sig hneyslað á þeirri orðræðu sem almennir starfsmenn þínar hafa haft um mig persónulega, fyrirtæki mitt, fjölskyldu og starfsfólk.

Ég er jafnframt að fá í hendur innanhús gögn frá ykkur sem eru víst af sama meiði. Lítið leggst nú fyrir kappana en það var nú ekki úr háum söðli að detta í ykkar tilfelli og því kemur mér þetta ekki óvart.

Ég ætla mér ekki að fara á sama ról þið í þessum málum, ég veit að MS er gott fyrirtæki með mörgu góðu og hæfu starfsfólk sem nú líður fyrir misgjörðir misvitra manna. En mest líða þó neytendur og bændur í þessu máli og munu á endanum bera skaðan af ykkar framgöngu allri. Óska MS  og ykkur velfarnarðar og blessunar.

Virðingarfyllst,

Ólafur M. Magnússon