Lagði áherslu á að RÚV fengi útvarpsgjaldið óskert

„Magnús Geir [Þórðarson, útvarpsstjóri] útskýrði stöðuna fyrir starfsfólki og fór yfir reksturinn og efnahaginn,“ segir Hallgrímur Indriðason, formaður Félags fréttamanna hjá RÚV.

Boðað var til starfsmannafundar meðan starfsmanna RÚV í Efstaleitinu í morgun. Mikið hefur verið fjallað um rekstur RÚV í fjölmiðlum að undanförnu en fjárhagsstaða Ríkisútvarpsins er erfið, stofnunin átti ekki fyrir greiðslu af skuldabréfi sem var á gjalddaga í dag og hefur því verið samið um að fresta gjalddaga um þrjá mánuði. Félagið er yfirskuldsett og nema skuldir RÚV 5,5 milljörðum króna, stærstur hluti vegna lífeyrissjóðsskuldbindinga félagsins.

„Hann sagði meðal annars á fundinum að hann hefi lagt ríka áherslu á það við ráðamenn að það væri mikilvægt að RÚV fengi útvarpsgjaldið óskert eins og það væri núna, ef ekki þá þyrfti að eiga sér stað einhver grundvallarbreyting á þjónustu RÚV.“

Magnús Geir sagði á fundinum að aðeins tvær leiðir væru í stöðunni fyrir RÚV. 

„Annarsvegar óbreytt þjónusta og þá yrði að leiðrétta þjónustutekjurnar þannig að RÚV fengi útvarpsgjaldið eða þá að tekjurnar yrðu óbreyttar og þá yrði að leggja einhverjar þjónustur niður.Það væri ákvörðun sem stjórnmálamenn þyrftu að taka.“

Hallgrímur segir það augljóst að ef stjórnmálamenn ákveða að halda óbreyttum tekjum til RÚV þýði það að þjónusta verði lögð niður og uppsagnir óhjákvæmilegar. 

Hallgrímur segir að fundurinn hafi gengið vel og mikil ánægja meðal starfsfólks með hann. 

„Það var mikil ánægja meðal starfsmann að fá svona góðar upplýsingar, því það hefur kannski ekki alltaf verið fyrir hendi. Þetta var mjög upplýsandi og gott var að fá þetta yfirlit.“

Hallgrímur segir að röngum fullyrðingum hafi verið slegið fram að undanförnu. 

„Því hefur verið haldið fram að hér hafi ekkert verið hagrætt þegar stöðugildum hefur fækkað um þrjátíu prósent. Síðan er ekki nema rétt rúm fimmtíu prósent af útgjöldum RÚV sem eru að fara í dagskrána sjálfa og restin fer í fjármagnskostnað, rekstur dreifikerfis og afborgarnir af húsinu. Það er því ekki mikið pláss fyrir hagræðingu innan núverandi ramma. Það hefur vakið ákveðna gremju að verið sé að slá fram röngum fullyrðingum um RÚV og stöðuna.“