Frans páfi einna líklegastur til að hreppa friðarverðlaun Nóbels

Frans páfi er talinn einna líklegastur til að hreppa friðarverðlaun Nóbels en tilkynnt verður um nýjan handhafa verðlaunanna klukkan níu á morgun, föstudag. Pakistanska baráttukonan Malala Yousafzai og Vladimír Pútín Rússlandsforseti eru einnig meðal tilnefndra.

Alls bárust 278 tilnefningar til norsku Nóbelsnefndarinnar, þar af 231 einstaklingur og 47 samtök. Tilnefningarnar hafa aldrei verið fleiri. Þingmenn, háskólaprófessorar og fyrrum friðarverðlaunahafar eru í hópi þeirra sem eiga kost á að senda inn tilnefningar til norsku Nóbelsnefndarinnar. Tilnefningar áttu að berast fyrir 1. febrúar síðastliðinn og í apríl var búið að fækka þeim sem til greina komu í nokkra tugi.

Í frétt sænska ríkissjónvarpsins kemur fram að alþjóðlegir veðbankar telji Frans páfa vera líklegastan til að hreppa hnossið, en Nóbelsnefndin hefur þó oft komið mönnum á óvart með vali sínu.

Yfirbragð páfans síðustu misserin þykir hafa gefið Páfagarði nýja ímynd og er barátta hans gegn fátækt sérstaklega nefnd í rökstuðningi hvers vegna Frans ætti að hljóta verðlaunin. Þá hefur Frans páfi látið hafa eftir sér að kirkjan megi ekki einkennast af þröngsýnum hugmyndum, en margir litu á ummælin sem að hann hafi með þeim verið að rétta út sáttahönd til samkynhneigðra.

Páfar hafa margoft verið tilnefndir til friðarverðlauna Nóbels en aldrei fengið. Raunar heyrir það til algerra undantekninga að trúarleiðtogar hljóti verðlaunin.

Rússnesk nefnd hefur tilnefnt Pútín „þar sem hann hafi með íhlutun sinni komið í veg fyrir að Bandaríkjaher réðist á Sýrland eftir eiturvopnaárás haustið 2013.“ Þess í stað hafi Sýrlendingar samþykkt að afhenda öll efnavopn sín.

Uppljóstrararnir Edward Snowden og Chelsea Manning eru einnig tilnefnd. Það á einnig við um Rússann Igor Kotjetkov, Úgandamanninn Frank Mugisha och Nepalann Sunil Babu Pant sem allir eru baráttumenn samkynhneigðra. Alþjóðleg réttingasamtök hinsegin fólks, ILGA, eru einnig tilnefnd.

Efnavopnastofnunin (OPCW) hlaut friðarverðlaun Nóbels í fyrra fyrir starf sitt í Sýrlandi, en OPCW er fjölþjóðleg stofnun sem hefur aðsetur í Haag í Hollandi. Stofnunin er í nánu samstarfi við Sameinuðu þjóðirnar og beitir sér fyrir eyðingu efnavopna á heimsvísu og því að samningum þess efnis sé framfylgt.