Kína lokar á fréttir um mótmælin

Yfirvöld í Kína hafa lokað á allan fréttaflutning og myndbirtingar þarlendis sem tengjast mótmælunum í Hong Kong. Tugþúsundir lýðræðissinna hafa nær lokað borginni í mótmælunum og lamað alla umferð og starfsemi í borginni. Krafist er aukins lýðræðis og að stjórnvöld í Peking skipti sér ekki af kosningunum sem á að halda árið 2017.

Hong Kong er hluti af kínverska alþýðuveldinu en nýtur takmarkaðrar sjálfstjórnar.Ástæða mótmælanna er sú ákvörðun kommúnistaflokks Kína að skipta sér af því hverjir geti boðið sig fram í kosningunum í Hong Kong árið 2017 sem Kínverjar lofuðu eftir að þeir tóku við borginni úr höndum Breta á árið 1997.

Mótmælin hafa vakið mikla athygli og þá einna helst hve vel þau hafa farið fram. Mótmælendurnir flestir sitja kyrrum kjörum á götum borgarinnar, eru afar kurteisir og friðsamir og hirða upp eftir sig allt rusl og annan óþrifnað. Lögregla hefur þó beitt táragasi og handtekið fjölda fólks.

CY Leung, æðsti embættismaður Hong Kong, segir mótmælin vera ólögleg og að kosningar muni fara fram eins og áætlað var. Yfirvöld í Kína hafa einnig sett sig gegn mótmælunum og segja yfirvöld í Hong Kong hafa fullan stuðning frá meginlandinu.