Tusk nú líklegasti arftaki van Rompuy

Donald Tusk, forsætisráðherra Póllands, er nú talinn líklegastur til að hreppa embætti forseta leiðtogaráðs ESB.

Leiðtogar aðildarríkja ESB koma saman til fundar á laugardaginn þar sem þeir munu koma sér saman um arftaka Hermans van Rompuy, ásamt arftaka Catherine Ashton í stóli utanríkismálastjóra sambandsins.

Verði Tusk fyrir valinu yrði það mikill sigur fyrir aðildarríki í austurhluta álfunnar, sem gengu flest í sambandið fyrir tíu árum síðan.

Tusk er Evrópusinni, hægra megin við miðju, en hefur neitað því opinberlega að vera einn af þeim sem til greina kæmi í stöðuna.

Heimildarmenn Reuters sögðu að van Rompuy myndi varpa fram nafni Tusk sem hluta af heildarpakka í símtölum sínum við leiðtogum fyrir fundinn. Síðustu mánuði hefur nafn danska forsætisráðherrans Helle Thorning-Schmidt oftast verið nefnt í tengslum við stöðuna.

Náist samkomulag um Tusk er líklegast að Federica Mogherini, utanríkisráðherra Ítalíu, muni taka við stöðu Ashton í stóli utanríkismálastjóra sambandsins.

Í frétt Euractiv segir að Valdis Dombrovskis, fyrrum forsætisráðherra Lettlands, sé talinn vera álitlegasti varakosturinn, náist ekki samkomulag um Tusk, eða þá að hann ákveði að þiggja ekki stöðuna.