Baráttan við skógareldana gengur betur

Betur hefur gengið að hemja skógareldana í Svíþjóð síðustu klukkustundirnar en þeir hafa brunnið nær stjórnlaust í sex daga. Nú segjast slökkviliðsmenn hafa náð að hefta útbreiðslu þeirra í Västmanland og því er ekki talið að bærinn Norberg sé í hættu eins og óttast var í gær.

Því hefur verið ákveðið að leyfa íbúum bæjarins að snúa aftur til síns heima. Í nótt rigndi dálítið á svæðinu og frekari rigningar eru í kortunum í dag sem gefur slökkviliðsmönnum von um að að hægt verði að vinna bug á eldhafinu sem þegar hefur kostað eitt mannslíf og þá er einn alvarlega slasaður á sjúkrahúsi.