Jafntefli í fyrsta leik hjá Aroni Einari og félögum

Aron Einar Gunnarsson lék allan leikinn með Cardiff City í kvöld þegar liðið gerði 1-1 jafntefli á útivelli á móti Blackburn Rovers í fyrsta leik ensku b-deildarinnar á tímabilinu 2014-15.

Cardiff City féll úr ensku úrvalsdeildinni síðasta vor og liðið hefur misst marga sterka leikmenn en norski knattspyrnustjórinn Ole Gunnar Solskjær hefur reynt að styrkja liðið á móti.

Þetta byrjaði vel hjá Cardiff þegar Kenwyne Jones skoraði fyrsta mark leiksins strax á áttundu mínútu þegar hann skallaði boltann í netið eftir aukaspyrnu Peter Whittingham sem Mark Hudson skallaði áfram.

Blackburn náði að jafna metin á 40. mínútu þegar Tom Cairney skoraði með laglegu skoti en umræddur Peter Whittingham tapaði þá boltanum á slæmum stað fyrir framan teiginn.

Cardiff fékk fleiri færi í fyrri hálfleiknum en Blackburn var mikið inn í leiknum. Blackburn var síðan sterkara liðið í seinni hálfleiknum en tókst ekki að tryggja sér sigur og 1-1 jafntefli varð niðurstaðan.