Innlent

Urgur innan þingflokks Sjálfstæðisflokks

Jakob Bjarnar skrifar
Þingmenn Sjálfstæðisflokks eru allt annað en ánægðir með Sigurð Inga. „Byggðapólitík getur ekki bara verið fólgin í því að færa störf frá einum stað í annan,“ segir Ragnheiður þingflokksformaður.
Þingmenn Sjálfstæðisflokks eru allt annað en ánægðir með Sigurð Inga. „Byggðapólitík getur ekki bara verið fólgin í því að færa störf frá einum stað í annan,“ segir Ragnheiður þingflokksformaður.
Sú ákvörðun, sem Sigurður Ingi Jóhannsson kynnti ríkisstjórninni fyrir skömmu, um að flutning Fiskistofu frá Hafnarfirði til Akureyrar, ætlar að reynast umdeild, svo mjög að hún gæti reynt verulega á samstarf ríkisstjórnarflokkanna. Nokkrir þingmenn Sjálfstæðisflokksins hafa þegar lýst sig ósammála þessum áformum, Vilhjálmur Bjarnason segist ekki geta stutt þau. Hann segir málið ekki grundvallast á mikilli skoðun og segist, í samtali við RÚV, vilja fá að vita nákvæmlega hvað vakir fyrir mönnum. Aðrir þingmenn gagnrýna þetta einnig, svo sem Brynjar Níelsson, Jón Gunnarsson og sjálfur þingflokksformaðurinn, Ragnheiður Ríkharðsdóttir.

Ekki góð aðferðafræði

Ekki er úr vegi að spyrja Ragnheiði hreint úr: Bendir þetta ekki til bullandi óánægju innan þingflokksins?

„Það er alveg ljóst að þessir fjórir þingmenn; við höfum gagnrýnt og sagt að við séum ósátt við þennan flutning. Og ég, fyrir mitt leyti, tel að það þurfi að rökstyðja betur af hverju slík ákvörðun er tekin og af hverju hún er tekin með þeim hætti sem hún er tekið. Ég held að aðferðarfræðin sé ekki góð þó ég sé sammála því að færa megi störf út á land en það þýðir ekki að það eigi að taka þau einhvers staðar annars staðar. Það verður að búa til aðstæður sem skapa störf á landsbyggðinni.“

Þarna liggur ekki fyrir nein úttekt á því hvort þetta sé hagkvæmt fyrir heildina?

„Mér er ekki kunnugt um það og ef flutningur kostar á bilinu 100 til 200 milljónir í upphafi, þá tekur æði langan tíma að ná fram hagræði í því til lengri tíma litið. Og ef sá mannauður sem er á Fiskistofu í Hafnarfirði ætlar ekki með hlýtur það að kalla á þjálfun, uppbyggingu og færni hjá nýju starfsfólki.“

Byggðapólitík hlýtur að taka mið af heildinni

Liggur þá ekki fyrir að þessi gjörningur muni reyna á ríkisstjórnarsamstarfið?

„Ég ætla nú ekkert að leiða neinum líkum að því. Það er ýmislegt sem ráðherrar í ríkisstjórn innan sinna málaflokka ákveða að gera þó heildin sé ekki samstiga. Hins vegar er þetta þannig mál að það hefði þurft að ræða það með öðrum hætti og þetta sé ekki mál einstakra ráðherra endilega að fara í slíkan flutning þegar tveir eða fleiri flokkar eru í samstarfi. Þá megi ræða málin áður en farið er af stað.“

En má ekki segja að þetta sé blind landsbyggðapólitík sem Framsóknarflokkurinn er að reka í nafni ríkisstjórnarinnar?

(Löng þögn.) „Ég á nú erfitt með að svara kannski akkúrat þessari spurningu. En byggðapólitík hlýtur líka að þurfa að taka mið af heildinni, taka mið af mannauði og hún getur ekki bara verið fólgin í því að færa störf frá einum stað í annan án þess að það sé skoðað. Ekki frekar en þegar Vísir ákvað að loka á Djúpavogi og á Þingeyri, þá var ástæða til að ræða það jafnt í þinginu sem og í ríkisstjórn. Og við hljótum að líta á atvinnutækifæri í landinu í heild sinni og hvar skynsamlegast sé að þau séu hverju sinni.“


Tengdar fréttir

Fiskistofa flutt á Akureyri

Um 70 manns starfa hjá Fiskistofu og er ljóst að þetta er mikil lyftistöng fyrir atvinnulífið í Eyjafirði.

Ættu að lesa áætlun sem þeir samþykktu sjálfir

Sigurður Ingi Jóhannsson gefur lítið fyrir þau mótmæli sem hafa heyrst frá þingmönnum Sjálfstæðisflokksins. Hann telur þetta eðlileg viðbrögð þingmanna höfuðborgarsvæðisins. Hann biðlar til þeirra að lesa stjórnarsáttmálann betur.

Velgjörðarmaður að sunnan

Hér á landi er viss tilhneiging til að lifa sig inn í hlutskipti eða hugmynd án þess að veruleikinn sé endilega alltaf hafður með í ráðum.

„Ég efast um að einhver fari norður“

„Það tekur þessu enginn vel. Þetta var bara köld vatnsgusa í andlitið. Við lítum á þetta sem ígildi fjöldauppsagna,“ segir reynslumikill starfsmaður hjá Fiskistofu.

Leggja áherslu á að sátt náist um flutning Fiskistofu

Forsvarsmenn Akureyrarbæjar hafa sent frá sér tilkynningu varðandi flutning Fiskistofu til bæjarins en þar kemur fram að skilningur sé á þeim áhyggjuröddum sem fram hafa komið frá starfsmönnum stofnunarinnar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.