Hamas-samtökin reiðubúin í vopnahlé

Hamas-samtökin hafa boðist til að gera hlé á eldflaugaárásum sínum stöðvi Ísraelsher loftárásir sínar á Gasa-ströndina. BBC hefur eftir heimildarmönnum sínum að egypskir embættismenn hafi haft milligöngu um mögulegan samning um vopnahlé milli deiluaðila. Ísraelsstjórn hefur enn ekki tjáð sig um málið.

Að sögn talsmanns Ísraelshers var fjórum eldflaugum skotið frá Gasa í gær, en engar tilkynningar bárust um mannskaða.

Mikil spenna er í austurhluta Jerúsalem vegna útfarar Mohammed Abu Khadir, sautján ára palestísks drengs, sem fullyrt er að hafi verið fyrst rænt og síðar myrtur til að hefna fyrir dauða þriggja ísraelskra unglinga sem myrtir voru á Vesturbakkanum. Mikil átök hafa verið á síðustu tvo daga milli grímuklæddra Palestínumanna og ísraelskrar lögreglu.