Solskjaer: Hef ekki haft þau áhrif sem ég vildi

Cardiff City féll úr ensku úrvalsdeildinni í gær eftir eins árs veru. Ole Gunnar Solskjaer, sem tók við liðinu á miðju tímabili, var þó nokkuð brattur eftir 3-0 tapið gegn Newcastle.

"Ég er svo stoltur af frammistöðunni, við spiluðum stórkostlega og við höfum aldrei skapað okkur jafn mörg færi, og það svona góð færi. Boltinn vildi bara ekki fara inn," sagði Solskjaer.

"Við erum fallnir og það er mjög erfitt að kyngja því. Þetta var skrítin dagur og það var hljótt í búningsherberginu eftir leikinn. Það er aldrei gaman að falla en við verðum að snúa bökum saman og koma sterkir til leiks á næsta tímabili. Cardiff er vant að vera í toppbaráttunni í næstefstu deild og við verðum að nýta þá reynslu á næstu leiktíð."

"Þú verður að horfast í augu við staðreyndir. Og það ætla ég að gera. Ég veit hvað ég var að fara út í. Ég hef ekki haft þau áhrif sem ég vildi og við verðum að fá tíma til að melta niðurstöðu tímabilsins, en ég gekk í gegnum erfiða tíma sem leikmaður," sagði Solskjaer, en Cardiff hefur aðeins unnið fimm af þeim 20 leikjum sem hann hefur stýrt liðinu í.