Mourinho: Mér buðust auðveldari ævintýri en að taka við Chelsea

Chelsea afgreiddi sig líklega endanlega úr titilbaráttunni á Englandi í gær þegar liðið gerði markalaust jafntefli við Norwich en vinni Liverpool mánudagsleikinn gegn Crystal Palace í kvöld getur Chelsea ekki náð því að stigum.

Chelsea heimsækir fallið lið Cardiff í síðustu umferðinni um næstu helgi en José Mourinho, knattspyrnustjóri Chelsea, sagði eftir jafnteflið í gær: „Þetta er félagið sem ég vil vera hjá og er félagið sem ég elska.“

Hann kom aftur til Chelsea síðasta sumar eftir að gera góða hluti með Inter og Real Madrid í millitíðinni en Portúgalanum tókst ekki að vinna titil á endurkomutímabilinu á Brúnni.

„Mér stóðu auðveldari ævintýri til boða ef ég vildi fara eitthvað og vinna titla,“ sagði Mourino sem vann deildina tvisvar í röð árin 2005 og 2006 auk þess að gera liðið að bikarmeisturum 2007 þegar hann var stjóri liðsins í fyrra skiptið.

„Strákarnir stóðu sig vel á tímabilinu. Við erum ekkert algjörlega ánægðir en þetta er gott til að byggja á fyrir næsta tímabil. Við vorum alltaf á meðal þeirra fjögurra efstu og alltaf í titilbaráttunni. Okkur tókst bara ekki að vinna þetta á endanum.“