Sunderland bjargaði sér með sigri á WBA

Sunderland verður áfram í ensku úrvalsdeildinni á næsta tímabili en lærisveinar Gus Poyet björguðu sér endanlega frá falli í kvöld með því að vinna West Bromwich Albion 2-0 á heimavelli.

Útlitið var ekki bjart um tíma fyrir Sunderland sem hefur setið í fallsæti stóran hluta tímabilsins. Sunderland tapaði fimm leikjum í röð frá 22. mars til 12. apríl en Poyet tókst að koma sínum mönnum í gang. Liðið hefur átt magnaðan endasprett og vann sinn fjórða deildarleik í röð í kvöld.

Bæði mörk Sunderland-liðsins komu í fyrri hálfleiknum. Jack Colback skoraði það fyrra á 13. mínútu eftir fyrirgjöf Marcos Alonso en það seinna skoraði Fabio Borini á 31. mínútu eftir samspil við Sebastian Larsson.

Sunderland er þar með komið með 38 stig eða fimm stigum meira en Norwich sem er í þriðja neðsta sætinu.

Norwich er þremur stigum á eftir West Bromwich Albion en Albion-liðið er með það mikið betri markatölu að Norwich er í raun fallið úr deildinni. Fulham og Cardiff féllu um síðustu helgi og það verður því engin fallbarátta í lokaumferðinni.