Sjálfsmark færði Derby sigurinn

Derby vann 2-1 útisigur á Brighton í kvöld í fyrri undanúrslitaleik liðanna í umspilinu um laust sæti í ensku úrvalsdeildinni í fótbolta. Derby er því skrefi nær því að komast í hóp þeirra bestu.

Sjálfsmark markvarðarins Tomasz Kuszczak færði Derby sigurinn á silfurfati en seinni leikurinn verður síðan spilaður á heimavelli Derby-liðsins.

Brighton komst í 1-0 í leiknum eftir átján mínútna leik en Derby jafnaði þegar Chris Martin skoraði úr vítaspyrnu á 29. mínútu.

Tomasz Kuszczak hafði ekki heppnina með sér í uppbótartíma fyrri hálfleiksins þegar skot Chris Martin fór af slánni og í fyrrum markvörð Manchester United og í markið.

Brighton var betra liðið í seinni hálfleiknum en tókst ekki að koma boltanum framhjá Lee Grant í marki Derby sem átti flottan leik í kvöld.