Wenger: Wilshere verður klár fyrir HM

Jack Wilshere, miðjumaður Arsenal og enska landsliðsins í fótbolta, verður mögulega í leikmannahópi Arsenal í lokaumferð ensku úrvalsdeildarinnar í fótbolta sem fram fer á sunnudaginn.

Wilshere hefur ekki spilað leik síðan hann brákaði bein í fæti í leik með enska landsliðinu í mars en Englendingar vonast til að hann verði klár áður en HM byrjar um miðjan næsta mánuð.

„Það verða allir klárir sem spiluðu á móti West Brom. Síðan gætu Aaron Ramsey og Jack Wilshere snúið aftur. Ég veit ekki hversu mikið Wilshere spilar en hann verður klár fyrir HM,“ segir ArseneWenger, knattspyrnustjóri Arsenal.

Roy Hodgson, þjálfari enska landsliðsons, býst einnig við því að Alex Oxlade-Chamberlain verði klár fyrir Brasilíuferðina en hann er enn frá vegna nárameiðsla.