Taugar leikmanna Man. City héldu og liðið er Englandsmeistari

Manchester City varð Englandsmeistari í dag er liðið vann afar sannfærandi sigur, 2-0, á West Ham.

City dugði jafntefli í leiknum til þess að tryggja sér titilinn en leikmenn liðsins voru ekki að tefla á tvær hættur með það.

Þeir tóku völdin strax í upphafi leiks og í raun var ekki spurning um hvort heldur hvenær liðið kæmist yfir.

Markið kom skömmu fyrir hlé. Frábært skot hjá Samir Nasri utan teigs sem fór í stöngina og inn. Í upphafi síðari hálfleiksins skoraði síðan fyrirliðinn Vincent Kompany og gulltryggði titilinn.

Annar titill Man. City á þrem árum og bikarinn fer ekki úr Manchester-borg heldur færist til í borginni.

Mörkin hjá Nasri og Kompany.