Hanna Birna Kristjánsdóttir innanríkisráðherra var gestur Mikaels Torfasonar í Minni skoðun í dag. 

Farið var yfir víðan völl í viðtalinu en meðal annars var fjallað um leka minnisblaðs úr innanríkisráðuneytinu sem vakið hefur undrun margra. Helga Vala Helgadóttir, héraðsdómslögmaður og 'virkur í athugasemdum' vikunnar, spurði Hönnu hreint út hver lekið hefði minnisblaðinu.

„Ég get ekki svarað því,“ sagði Hanna Birna.

„Veit það ekki. Þess vegna er málið í ákveðinni rannsókn.“

Hún tók það fram að ráðuneytið hefur margsinnis harmað lekann en gat lítið tjáð sig um rannsókn málsins sem er í gangi.

Hanna Birna sagði einnig að ríkisstjórnin útilokaði ekkert þegar kæmi að viðræðuslitum Íslands við Evrópusambandið.

Í máli hennar kom fram að hún hefði annað plan í gjaldeyrismálum fyrir Ísland en Evrópusambandsaðild og að hún hefði trú á því að með aðgerðum hér innanlands megi koma gjaldeyrismálum í betra horf, það sé einnig skoðun ríkisstjórnarinnar. Hún vill klára umræðu um viðræðuslit og segir bæði sig, forsætisráðherra og fjármálaráðherra opin fyrir því að skoða aðkomu almennings að því verkefni.