Gerrard: Við getum unnið titilinn

Steven Gerrard, fyrirliði Liverpool, sagði að það hefði verið skrítið að taka þrjár vítaspyrnur í einum og sama leiknum. Hann skoraði úr tveimur í 0-3 sigri Liverpool á Man. Utd í dag.

"Þetta var stórkostlegur dagur fyrir mig persónulega. Það var magnað að koma hingað og vera betra liðið frá upphafi til enda," sagði Gerrard.

"Við munum njóta þessa sigurs í kvöld en síðan förum við að hugsa um næsta verkefni. Við sýndum að við getum keppt um titilinn og við munum berjast allt til enda.

"Við spiluðum demantamiðju í dag og réðum öllu á miðjunni. Vörn Man. Utd hefur ekki fengið erfiðara verkefni í vetur en hún fékk hjá framherjum okkar í dag.

"Við trúum því að við getum unnið deildina en það er auðvelt að tala um það. Við verðum að mæta Cardiff og Sunderland á sama hátt og Man. Utd."