Aðeins leikmenn úr átta bestu liðunum fá tækifæri með landsliðinu

Adam Johnson, leikmaður Sunderland, segir það nær ógerlegt fyrir leikmenn utan átta bestu liða Englands að fá sæti í enska landsliðinu undir stjórn Roy Hodgson.

Það kom nokkuð á óvart að Johnson var ekki valinn í 30 manna hóp Englands fyrr í mánuðinum fyrir vináttuleikinn gegn Danmörku. Hann var þá búinn að skora sjö mörk í níu leikjum og vera kjörinn leikmaður mánaðarins.

Útileikmennirnir sem valdir voru komur úr Arsenal, Chelsea, Tottenham, Manchester United, Manchester City, Liverpool, Everton og Southampton. Þeir einu sem tilheyrðu ekki þessum liðum voru JermaineDefoe, leikmaður Toronto FC, og StevenCaulker, leikmaður Cardiff, en báðir eru fyrrverandi leikmenn Tottenham.

Andros Townsend var meira að segja valinn í enska landsliðið gegn Danmörku en hann hafði þá ekki byrjað leik fyrir Tottenham síðan 10. nóvember og vægast sagt tekið mikla dýfu eftir ágætis byrjun á tímabilinu.

„Ég held að þetta hafi komið fólki á óvart,“ segir Johnson, sem á að baki 12 landsleiki, í viðtali við The Guardian.

„Ég tel að flestir hafi búist við því að ég væri í hópnum en allir leikmennirnir komu úr efstu átta liðunum nema Caulker. Og hann var bara valinn fyrir PhilJagielka sem var meiddur. Ég held að það segi ýmislegt um valið. Það skiptir engu máli hvernig þú spilar heldur fyrir hvaða lið þú spilar.“

„Þetta er bara staðreynd, er það ekki? Ef litið er á síðustu tíu landsliðshópa þá hafa leikmenn úr Southampton verið að koma inn og það er á meðal efstu átta. Restin kemur úr Everton, Tottenham, United, City og fleiri liðum eins og þeim,“ segir Johnson og bendir á að stundum fékk hann sjálfur leiki sem hann átti kannski ekki skilið þegar hann var á mála hjá Man. City.

„Ég spilaði alla mína landsleiki sem City-maður. Stundum var ég valinn í landsliðshópinn þó ég væri ekki að spila. Nú spila ég mun meira en fæ ekki landsleik. Þetta er ekkert bara ég að vera fúll heldur eru þetta staðreyndir. Sumir leikmannanna í enska hópnum væru ekki nálægt því að vera valdir ef þeir væru ekki í ákveðnum liðum,“ segir Adam Johnson.