Mikilvægir sigrar hjá Liverpool og Tottenham - úrslitin í enska

Liverpool og Tottenham fylgja efstu liðunum eftir í ensku úrvalsdeildinni í fótbolta eftir mikilvæga sigra í kvöld. Arsenal og Manchester United gerðu markalaust jafntefli í stórleik kvöldsins.

Sigrar Liverpool og Tottenham voru afar mikilvægir en af sitt hvorri gerðinni. Tottenham lék sér að Newcastle í 4-0 sigri á St. James Park en Liverpool vann 3-2 endurkomusigur á botnliði Fulham þökk sé vítaspyrnumarki fyrirliðans Steven Gerrard undir lokin.

Arsenal og Manchester United gerðu markalaust jafntefli í stórleik kvöldsins. Úrslitin eru mikil vonbrigði fyrir Arsenal sem tapaði illa fyrir Liverpool um síðustu helgi og þurfti á góðum úrslitum til að bæta stuðningsmönnum sínum þá sneypuför. Stuðningsmenn Arsenal voru heldur ekki sáttir og púuðu á sína menn eftir lokaflautið.

Daniel Sturridge reddaði málunum fyrir Liverpol í 3-2 útisigri á Fulham en hann átti þátt í öllum þremur mörkunum og fiskaði vítið sem Steven Gerrard skoraði úr sigurmarkið á fyrstu mínútu í uppbótartíma. Liverpool lenti undir í tvígang í leiknum en tókst að koma til baka og landa þremur mikilvægum stigum.

Emmanuel Adebayor skoraði tvö mörk fyrir Tottenham í 4-0 útisigri á Newcastle í ensku úrvalsdeildinni í kvöld en með þessum sigri eru Gylfi Þór Sigurðsson og félagar farnir að anda ofan í hálsmálið á Liverpool-mönnum. Adebayor hefur heldur betur verið Tottenham mikilvægur síðan að Tim Sherwood gaf honum tækifærið en Tógómaðurinn skoraði einnig sigurmarkið á móti Everton um síðustu helgi og hefur alls skorað 8 mörk í 10 deildarleikjum undir stjórn Sherwood.



Úrslit og markaskorarar í ensku úrvalsdeildinni í kvöld:

Arsenal - Manchester United 0-0

Newcastle - Tottenham 0-4

0-1 Emmanuel Adebayor (19.), 0-2 Paulinho (53.), 0-3 Emmanuel Adebayor (82.), 0-4 Nacer Chadli (88.)

Fulham - Liverpool 2-3

1-0 Sjálfsmark Kolo Touré (8.), 1-1 Daniel Sturridge (43.), 2-1 Kieran Richardson (63.), 2-2 Philippe Coutinho (72.), 2-3 Steven Gerrard, víti (90.+1).

Stoke - Swansea 1-1

1-0 Peter Crouch (18.), 1-1 Chico Flores (52.)

Everton - Crystal Palace Frestað vegna veðurs

Manchester City - Sunderland Frestað vegna veðurs