Solskjær að fylla Cardiff-liðið af Norðmönnum

Ole Gunnar Solskjær, knattspyrnustjóri Cardiff City er hrifinn af sínum gömlu lærisveinum hjá norska félaginu Molde en Norðmaðurinn hefur nú fengið þrjá landa sína til Wales.

Hinn 23 ára gamli Jo Inge Berget er nýjasti Molde-maðurinn sem kemur til Cardiff City en áður hafði velska félagið fengið þá Magnus Wolff Eikrem og Mats Møller Dæhli. Eikrem er 23 ára gamall miðjumaður og Dæhli er 18 ára miðjumaður.

Jo Inge Berget er sókndjarfur miðjumaður sem spilaði með Molde öll þrjú tímabilin sem Solskjær var þjálfari liðsins. Solskjær fékk hann einnig til Molde á sínum tíma.

„Hann veit hvernig fótbolta ég vil spila og hann er sterkur, klár, útsjónarsamur og skoraði á móti Englendingum í leik 21 árs liða þjóðanna. Hann mun standa sig vel með okkur," sagði Ole Gunnar Solskjær við Nettavisen.

Berget var með 17 mörk og 17 stoðsendingar í 63 leikjum á þessum þremur tímabilum undir stjórn Solskjær en Molde vann stóran titil á þeim öllum.