Fjármagna kaup á Cavani með sölu á Lukaku

Chelsea ætlar að selja belgíska framherjann Romelu Lukaku næsta sumar til að fjármagna kaup á öðrum framherja Edinson Cavani hjá Paris Saint-Germain.

Lukaku hefur skorað 26 mörk á láni hjá Everton og West Brom síðustu 18 mánuðina en Jose Mourinho knattspyrnustjóri Chelsea telur Belgan unga ekki nógu góðan til að eiga fast sæti í liði Chelsea.

Mourinho ætlar að kaupa framherja í hæsta gæðaflokki næsta sumar og horfir til Cavani sem fær ekki að leika í sinni bestu stöðu hjá PSG og er mjög ósáttur við það.

Lukaku er aðeins tvítugur og er talið að Chelsea vilji fá um 23 milljónir punda fyrir hann og hafa lið á borð við Arsenal, Tottenham og Atletico Madrid verið orðuð við hann.

Cavani gæti kostað um 50 milljónir punda og þarf Chelsea því að selja Lukaku og mögulega annað hvort Fernando Torres eða Demba Ba líka næsta sumar til að fjármagna kaupin á Úrúgvæanum.

„Enginn þriggja framherja okkar verður hér næstu tíu árin. Við höfum leikmenn í öðrum stöðum eins og Eden Hazard og Willian sem verða það aftur á móti. Demba Ba er 28 ára, Samuel Eto‘o 32ja og Torres 29 ára,“ sagði Mourinho sem ætlar þó ekki að kaupa framherja í janúar því rétti maðurinn er ekki á lausu.

„Einn framherjanna verður seldur fyrir einhvern sem getur verið hér lengi. Þegar við kaupum framherja munum við kaupa þann rétta en núna er ekki tíminn til þess.“